Շարունակելով բացառիկ միջազգային համագործակցությունների շարքը․․․
Դեկտեմբերի 12-ից Հայաստանի պատմության թանգարանում կբացվի «Երեկ և այսօր․ Ժակ դը Մորգանի հետքերով» միջազգային ցուցահանդեսը, որը կազմակերպվել է Հայաստանի պատմության թանգարանի և Ֆրանսիայի ազգային հնագիտության թանգարանի համագործակցությամբ, Հայաստանի Հանրապետությունում Ֆրանսիայի Հանրապետության դեսպանատան և ՀՀ կրթության, գիտության, մշակույթի և սպորտի նախարարության աջակցությամբ։
Ցուցահանդեսի շրջանակներում առաջին անգամ Ֆրանսիայից Հայաստան են բերվել և Հայաստանի պատմության թանգարանում ցուցադրվելու են ֆրանսիացի անվանի հնագետ Ժակ դը Մորգանի (1857-1924 թթ․) կողմից Ախթալայում 19-րդ դ․ 80-ական թթ․ պեղված բրոնզեդարյան և երկաթեդարյան հինգ ուշագրավ ցուցանմուշներ, որոնք ներկայացված են դեռ 1990-ական թթ․ հայ-ֆրանսիական արշավախմբերի կողմից տարբեր հնավայրերում հայտնաբերված և ՀՀ թանգարաններում պահվող ավելի քան վեց տասնյակ հնագիտական առարկաների համադրությամբ։
Ցուցահանդեսի շրջանակներում Հայաստանի պատմության թանգարանը համագործակցել է նաև Հայաստանում Ֆրանսիայի դեսպանության Ֆրանսիական ինստիտուտի, Ֆրանսիայի ժառանգության ինստիտուտի, «Էրեբունի» պատմահնագիտական ամրոց-թանգարանի, Շիրակի երկրագիտական թանգարանի, Պատմամշակութային ժառանգության գիտահետազոտական կենտրոնի, ինչպես նաև տարբեր կառույցներից ներգրավված մասնագետների հետ։
Ցուցահանդեսը բաց կլինի մինչև մարտի 11-ը։