1946–1948 թթ․ հայրենադարձությունը հայ ժողովրդի նորագույն պատմության կարևորագույն իրադարձություններից է, որը էական ազդեցություն է ունեցել ինչպես Հայաստանի ժողովրդագրական, սոցիալ-մշակութային, տնտեսական կյանքի, այնպես էլ՝ ազգային ինքնության վերակազմավորման և պետականաշինական գործընթացների վրա։

Հայաստանի պատմության թանգարանը կազմակերպում է Մեծ հայրենադարձության 80-ամյակին նվիրված`«Հայրենադարձության շերտերը» խորագրով միջազգային գիտաժողովը, որը նպատակ ունի նորովի բացահայտելու թեմային առնչվող թանգարանային հավաքածուները, քննարկելու երևույթի սոցիալական, մշակութային և պատմական տարբեր շերտերը։

Գիտաժողովն անցկացվելու է հուլիսի 2-4-ը՝ Հայաստանի պատմության թանգարանում։ Ներկայացված զեկուցումները պետք է ներառեն հետևյալ թեմատիկ ուղղությունները՝

• Զանգվածային հայրենադարձության փուլերը (1921-1936 թթ., 1946-1948 թթ., 1962 թ. և դրանից հետո)

• Հայրենադարձության կազմակերպման և հայրենադարձների Հայաստանում ընդունման խնդիրները

• Հայրենադարձների դիմագրաված մարտահրավերներն ու աստիճանական ինտեգրացումը խորհրդահայ հասարակության մեջ

• Հայրենադարձության քաղաքական-գաղափարախոսական, սոցիալական և մշակութային ազդեցությունները Հայաստանի և սփյուռքի նորագույն պատմության վրա

• Հայրենադարձների` «մնացողների» և հետագայում «արտագաղթողների» համեմատություն. կազմակերպման թերություններն ու շարժառիթները

• Հայրենադարձության և հետագա արտագաղթի արձագանքները Հայաստանում և սփյուռքում

• Հայրենադարձությունը հետխորհրդային Հայաստանում

• Հայրենադարձների մշակութային ժառանգությունը թանգարանային հավաքածուներում

• Հայրենադարձների արտագաղթը բանավոր պատմություններում

• Հայրենադարձության պատմությունների ուսումնասիրման մեթոդաբանական հարցեր

Ժամանակացույց՝

• Հունիսի 10 – հայտերի ընդունման վերջնաժամկետ

• Հունիսի 20 – մասնակցության հաստատման վերջնաժամկետ

• Հունիսի 25 – ծրագրի հրապարակում

• Հուլիսի 2-4 – գիտաժողով

• Օգոստոսի 1 – հոդվածների տրամադրում

Մասնակցության համար անհրաժեշտ է լրացնել հայտը և ներկայացնել համառոտ ամփոփագիր (մինչև 300 բառ) հետևյալ հղումով՝ https://shorturl.at/LXKeQ

Արտասահմանում գտնվող բանախոսները կարող են մասնակցել նաև առցանց ձևաչափով։

Աշխատանքային լեզուները՝ հայերեն, անգլերեն, ֆրանսերեն և ռուսերեն։

Ներկայացված զեկուցումները գրախոսվելուց հետո կհրապարակվեն «Աշխատություններ Հայաստանի պատմության թանգարանի» պարբերական գիտական ժողովածուի հերթական համարում։