Դավիթ Կոմիտասի Գրիգորյան, լեյտենանտ, դասակի հրամանատար (1997 թ. սեպտեմբերի 15, գ. Ջրվեժ – 2020թ. նոյեմբերի 3 Մարտունի -2):
2004-2014 թթ. սովորել և գերազանցությամբ ավարտել է Ջրվեժի միջնակարգ դպրոցը: 2014-2019 թթ. անվճար հիմունքներով ընդունվել և կարմիր դիպլոմով ավարտել է Երևանի պետական համալսարանի Արվեստաբանության բաժինը: 2019-2020 թթ. սովորել և գերազանցությամբ ավարտել է ՀՀ ՊՆ Վ. Սարգսյանի անվան ռազմական համալսարանի հրամանատարների ուսուցման դասընթացը և ստացել լեյտենանտի զինվորական կոչում: 2020 թ. օգոստոսի 22-ին երկամյա ծառայության է անցել Արցախի Հանրապետության «Մարտունի-2» զորամասում՝ որպես մարտկոցի կառավարման դասակի հրամանատար: 2020 թ. սեպտեմբերի 27-ից քաջաբար մարտնչել է թշնամու դեմ, ռազմաճակատի կարևորագույն հենակետից ճշգրիտ հաշվարկներով ապահովել զորամասի ողջ հրետանու նպատակային նշանառությունը, անվրեպ ոչնչացրել թշնամու մեծաքանակ զինտեխնիկա և կենդանի ուժ: Գտնվելով թշնամու շրջափակման մեջ, կրակի տակ պահելով հակառակորդին` փրկել է բազմաթիվ զինակից ընկերների կյանքն ու կանգուն պահել Մարտունին: 2020 թ. նոյեմբերի 3-ին զոհվել է թշնամու տանկի արձակած արկի բեկորից: Հետմահու պարգևատրվել է «Մարտական ծառայություն» մեդալով և «Մարտական խաչ» 2-րդ աստիճանի շքանշանով:
