Հրայր Մհերի Դանիելյան (1997 թ. հուլիսի 22, Արցախ գ. Նոր շեն – 2020 թ. հոկտեմբերի 15, Արցախ գ. Ծակուռի ):
Հրայրը 2003թ. սեպտեմբերի 1-ին ընդունվել է Ստեփանակերտի Խ. Աբովյանի անվան թիվ 1 դպրոցը, 2009թ-ից ուսումը շարունակել է Շուշիի Մուրացանի անվան ավագ դպրոցում: 2014թ. ընդունվել է Արցախի պետական համալսարանի տնտեսաիրավաբանական ֆակուլտետի իրավագիտություն բաժինը:
2015թ. զորակոչվել և ծառայել է ՊԲ 35383 զորամասում` որպես Դ-20 հրետանային դիվիզիոնի 2-րդ հրետանային մարտկոցի 3-րդ հրանոթի հրամանատար:
Մասնակցել է 2016թ. ապրիլյան պատերազմի մարտական գործողություններին: Ծառայության ընթացքում խրախուսվել է «Լավագույն զինվոր-մարզիկ», Հայոց բանակի «Գերազանցիկ», «Քաջարի մարտիկ» կրծքանշաններով և բազմաթիվ պատվոգրերով: 2017թ. ավագ սերժանտ զինվորական կոչումով ավարտել է պարտադիր ժամկետային ծառայությունը և շարունակել ուսումը ԱրՊՀ-ում:
2020թ. ավարտել է համալսարանը և նույն թվականի օգոստոսի 15-ից ծառայության է անցել ԱՀ ոստիկանության տնտեսական և կոռուպցիոն հանցագործությունների դեմ պայքարի բաժնում, որպես օպերլիազոր: Ուներ ոստիկանության լեյտենանտի կոչում:
2020թ. սեպտեմբերի 27-ին Արցախի դեմ Ադրբեջանի կողմից սանձազերծված պատերազմի առաջին օրվանից Հ.Մ.Դանիելյանը իր անմիջական մասնակցությունն է ունեցել Արցախի հանրապետության պաշտպանության համար մղված մարտական գործողություններին: 2020թ. սեպտեմբերի 27-ից 29-ը մարտական հերթապահություն է իրականացրել ՊԲ 34153 զորամասի մարտական դիրքերում, 2020թ. հոկտեմբերի 1-ից 3-ը հատուկ առաջադրանքով ծառայություն է իրականացրել ԱՀ Մարտունու շրջանում, 2020թ. հոկտեմբերի 5-ից 13-ը` ՊԲ 49971 զորամասի մարտական դիրքերում:
Պատերազմում հերթական առաջադրանքի կատարման ժամանակ, Հրայրը թշնամու ԱԹՍ-ի հարվածից կյանքի հետ անհամատեղելի ծանր բեկորային վնասվածքներ է ստացել ու հոկտեմբերի 15-ին զոհվել է Արցախի հանրապետության Հադրութի շրջանի Ծակուռի գյուղի վարչական տարածքի Թութակ կոչվող տեղամասում:
Հրայրի մեծագույն երազանքն անանձնական էր՝ տեսնել հայրենիքը հզոր, անվտանգ, զարգացած երկիր՝ պատմական աշխարհագրական սահմաններով, Արցախի, Արևմտյան Հայաստանի և կորուսյալ բոլոր տրածքների վերամիավորումով:
Կատարելապաշտ էր ամեն ինչում և երազանքներ շատ ուներ, բայց կյանքի իդեալը պատմական արդարության վերահաստատումն էր:
ԱՀ նախագահի ՆՀ-537-Ա 03 նոյեմբերի 2020թ. հրամանագրով Հրայր Դանիելյանը հետմահու պարգևատրվել է «Արիության համար» մեդալով:
